តើការជួញដូរដែលផ្អែកលើការធ្លាក់តម្លៃប្រាក់ដុល្លារអាមេរិកបានបញ្ចប់ហើយឬនៅ?

យោងតាមរបាយការណ៍របស់ Yardeni Research បានឱ្យដឹងថា យុទ្ធសាស្ត្រវិនិយោគដែលគេស្គាល់ថា “Dollar Debasement Trade” (ការភ្នាល់លើការធ្លាក់តម្លៃប្រាក់ដុល្លារអាមេរិក) ភាគច្រើនបានឈានដល់ទីបញ្ចប់ហើយ ខណៈចលនាទីផ្សារនាពេលថ្មីៗនេះ មិនបានគាំទ្រទស្សនៈដែលថាវិនិយោគិនកំពុងបោះបង់ទ្រព្យសកម្មរបស់សហរដ្ឋអាមេរិកនោះទេ។

របាយការណ៍បានបញ្ជាក់ថា ក្តីបារម្ភអំពីពន្ធគយ ឯករាជ្យភាពរបស់ធនាគារកណ្តាលអាមេរិក (Fed) និងឱនភាពថវិកាដែលកំពុងកើនឡើង បានថមថយទៅវិញ។ ទន្ទឹមនឹងនេះ អ្នកជួញដូរកំពុងដាក់តម្លៃទុកជាមុនថា អាមេរិកអាចដំឡើងអត្រាការប្រាក់ចំនួន ២ ដងនៅមុនដើមឆ្នាំ ២០២៧ បន្ទាប់ពីប្រធាន Fed លោក Kevin Warsh បានបញ្ជាក់ជាថ្មីអំពីការផ្តោតលើស្ថិរភាពតម្លៃ។

ទីផ្សាររូបិយប័ណ្ណក៏បានផ្លាស់ប្តូរទៅក្នុងទិសផ្ទុយពីទ្រឹស្តីនៃការធ្លាក់តម្លៃប្រាក់ដុល្លារផងដែរ។ សន្ទស្សន៍ប្រាក់ដុល្លារអាមេរិក (U.S. Dollar Index) បានកើនឡើងចាប់តាំងពីកិច្ចប្រជុំ Fed កាលពីសប្តាហ៍មុន ទោះបីជា ធនាគារកណ្តាលអឺរ៉ុប (ECB) និងធនាគារកណ្តាលជប៉ុន (BOJ) សុទ្ធតែបានដំឡើងអត្រាការប្រាក់ក៏ដោយ។

ប្រាក់អឺរ៉ូបានចុះខ្សោយក្នុងវគ្គជួញដូរថ្មីៗ ខណៈប្រាក់យ៉េនបានធ្លាក់ដល់កម្រិតដែលមិនធ្លាប់ឃើញតាំងពីឆ្នាំ ១៩៨៦ ដែលបង្ហាញថា គោលនយោបាយរូបិយវត្ថុតឹងរ៉ឹងនៅក្រៅសហរដ្ឋអាមេរិក មិនបានជួយឱ្យរូបិយប័ណ្ណទាំងនោះរឹងមាំជាងប្រាក់ដុល្លារឡើយ។

មាស និង Bitcoin ក៏បានធ្លាក់ចុះផងដែរ។ មាសបានរងសម្ពាធពីការឡើងថ្លៃនៃប្រាក់ដុល្លារ និងការកើនឡើងនៃអត្រាការប្រាក់ពិតប្រាកដ (real interest rates) ដែលជំរុញឱ្យមានការកាត់បន្ថយការព្យាករណ៍តម្លៃមាសចុងឆ្នាំ មកត្រឹម 5,000 ដុល្លារក្នុងមួយអោន ពី 5,500 ដុល្លារ។

Bitcoin បានធ្លាក់ពីលើស 120,000 ដុល្លារកាលពីចុងឆ្នាំមុន មកនៅប្រហែល 61,000 ដុល្លារ ដែលបញ្ជាក់ថា វានៅមិនទាន់ក្លាយជាជម្រើសសំខាន់ជំនួសប្រាក់ដុល្លារអាមេរិកនៅឡើយទេ។

ទីផ្សារទំនិញក៏បង្ហាញពីការថយចុះនៃក្តីបារម្ភអំពីអតិផរណាផងដែរ។ ប្រេង Brent បានធ្លាក់ចុះខ្លាំង បន្ទាប់ពីការបើកដំណើរការឡើងវិញនៃច្រកសមុទ្រ Hormuz ដែលបានលុបបំបាត់ភាគច្រើននៃបុព្វលាភហានិភ័យភូមិសាស្ត្រនយោបាយ (geopolitical risk premium) ទោះបីជាតម្លៃទង់ដែងនៅតែទទួលបានការគាំទ្រពីតម្រូវការពាក់ព័ន្ធនឹងបច្ចេកវិទ្យា AI ក៏ដោយ។

ទីផ្សារមូលបត្របំណុលក៏មិនបានគាំទ្រទស្សនៈអវិជ្ជមានចំពោះប្រាក់ដុល្លារដែរ។ ផលចំណេញមូលបត្របំណុលរដ្ឋាភិបាលអាមេរិកអាយុ 10 ឆ្នាំ (10-year Treasury yield) នៅតែស្ថិតក្នុងចន្លោះកំណត់ ខណៈតម្លៃប្រេងទាបបានជួយបន្ធូរបន្ថយការរំពឹងទុកអតិផរណា។

លំហូរមូលធននៅតែគាំទ្រសហរដ្ឋអាមេរិក។ ទិន្នន័យ Treasury International Capital (TIC) បានបង្ហាញថា លំហូរមូលធនឯកជនសុទ្ធចូលដល់ប្រហែល 1.3 ទ្រីលានដុល្លារ ក្នុងរយៈពេល 12 ខែគិតត្រឹមខែមេសា ដែលបង្ហាញថា វិនិយោគិនបរទេសកំពុងបន្តបង្កើន មិនមែនកាត់បន្ថយ ការកាន់កាប់មូលបត្រអាមេរិកឡើយ។