BofA ព្យាករថា Fed នឹងមិនកាត់បន្ថយអត្រាការប្រាក់ទៀតទេ រហូតដល់ឆ្នាំ 2028

ធនាគារ Bank of America (BofA) បានកែប្រែការព្យាករណ៍របស់ខ្លួនអំពីគោលនយោបាយរបស់ ធនាគារកណ្ដាលសហរដ្ឋអាមេរិក (Fed) ដោយឥឡូវនេះរំពឹងថា Fed នឹងដំឡើងអត្រាការប្រាក់ចំនួន 3 ដង សរុប 75 ពិន្ទុមូលដ្ឋាន (basis points) នៅក្នុងឆ្នាំនេះ មុននឹងរក្សាអត្រាការប្រាក់ឱ្យនៅថេររយៈពេលយូរ ដែលធ្វើឱ្យការកាត់បន្ថយអត្រាការប្រាក់អាចនឹងត្រូវរង់ចាំរហូតដល់ឆ្នាំ 2028។

អ្នកវិភាគ Aditya Bhave បាននិយាយថា BofA រំពឹងថា Fed នឹងដំឡើងអត្រាការប្រាក់ 25 ពិន្ទុមូលដ្ឋាននៅក្នុងខែកញ្ញា ខែតុលា និងខែធ្នូ ដែលនឹងធ្វើឱ្យអត្រាការប្រាក់គោលស្ថិតនៅចន្លោះ 4.25%–4.50%។ លោកបានសរសេរថា៖

«យើងគិតថា Fed នឹងរក្សាអត្រាការប្រាក់ឱ្យនៅថេរនៅឆ្នាំក្រោយ» ខណៈដែលអតិផរណាទំនងជានឹងនៅតែខ្ពស់គ្រប់គ្រាន់ ដើម្បីមិនឱ្យអត្រាការប្រាក់ពិតប្រាកដ (real policy rate) ក្លាយជាតឹងរ៉ឹងពេក។

ការព្យាករណ៍ថ្មីនេះផ្ទុយពីទស្សនៈមុនរបស់ BofA ដែលធ្លាប់សង្ស័យថា Fed នឹងត្រូវកាត់បន្ថយអត្រាការប្រាក់ ហើយឥឡូវនេះធនាគារយល់ថាការរំពឹងបែបនោះគឺលឿនពេក។

ទាក់ទងនឹងទីផ្សារការងារ លោក Bhave បានកត់សម្គាល់ថា ហានិភ័យនៃការធ្លាក់ចុះបាន “ថយចុះយ៉ាងច្បាស់” ដោយអត្រាអត់ការងារធ្វើនៅតែមានស្ថិរភាព បើធៀបនឹងខែឧសភាឆ្នាំមុន ទោះបីជាអត្រាការប្រាក់នៅពេលនោះខ្ពស់ជាងបច្ចុប្បន្ន 75 ពិន្ទុមូលដ្ឋានក៏ដោយ។

សម្រាប់អតិផរណា BofA បានបញ្ជាក់ថា៖

«បញ្ហាអតិផរណារបស់ Fed បានកាន់តែអាក្រក់ឡើងយ៉ាងច្បាស់»

ដោយសន្ទស្សន៍ Core PCE អាចឈានដល់ 3.5% នៅខែឧសភា ដែលខ្ពស់ជាងកម្រិតកាលពីមួយឆ្នាំមុនជិត 70 ពិន្ទុមូលដ្ឋាន។

BofA ក៏បានកែប្រែការវាយតម្លៃរបស់ខ្លួនចំពោះរបៀបដែល Fed ធ្វើការសម្រេចចិត្តគោលនយោបាយផងដែរ ដោយយោងទៅលើរបាយការណ៍ Summary of Economic Projections (SEP) ប្រចាំខែមិថុនា ដែលបង្ហាញថា អ្នកកំណត់គោលនយោបាយចំនួន 9 នាក់ បានព្យាករណ៍ពីការដំឡើងអត្រាការប្រាក់ បើទោះបីជាពួកគេមិនរំពឹងថាអត្រាអត់ការងារធ្វើនឹងធ្លាក់ចុះក៏ដោយ។ នេះបង្ហាញថា ការរឹតបន្តឹងទីផ្សារការងារមិនមែនជាលក្ខខណ្ឌចាំបាច់សម្រាប់ Fed ក្នុងការចាត់វិធានការទៀតឡើយ។

សន្និសីទសារព័ត៌មានរបស់ប្រធាន Fed លោក Kevin Warsh ក៏បានពង្រឹងទស្សនៈនេះផងដែរ។ លោក Bhave បានកត់សម្គាល់ថា លោក Warsh បានសង្កត់ធ្ងន់ជាបន្តបន្ទាប់លើសារៈសំខាន់នៃការស្តារស្ថិរភាពតម្លៃ និងបានបញ្ជាក់ថា គោលនយោបាយបច្ចុប្បន្នមិនមានលក្ខណៈតឹងរ៉ឹងខ្លាំងនោះទេ។

BofA បានបញ្ជាក់ថា កត្តាសំខាន់ៗដែលអាចធ្វើឱ្យផែនការដំឡើងអត្រាការប្រាក់នេះត្រូវបានរំខាន រួមមាន៖

• ការធ្លាក់ចុះយ៉ាងខ្លាំងនៃការបង្កើតការងារថ្មី (payrolls)
• ទិន្នន័យ Core PCE ទន់ខ្សោយជាងការរំពឹងទុក
• ការធ្លាក់ចុះធ្ងន់ធ្ងរនៅក្នុងទីផ្សារភាគហ៊ុន