ការជួញដូរលើសន្ទស្សន៍ KOSPI ត្រូវបានផ្អាកបណ្តោះអាសន្ន បន្ទាប់ពីភាគហ៊ុនផលិតបន្ទះឈីបកើនឡើងខ្លាំង ធ្វើឱ្យសន្ទស្សន៍ហក់ឡើងជាង 5%

ក្រុមហ៊ុនប្រតិបត្តិការផ្សារហ៊ុនរបស់កូរ៉េខាងត្បូង បានផ្អាកការជួញដូរជាបណ្តោះអាសន្នលើសន្ទស្សន៍គោល KOSPI កាលពីថ្ងៃព្រហស្បតិ៍ បន្ទាប់ពីសន្ទស្សន៍នេះបានកើនឡើងជាង 5% នៅពេលបើកទីផ្សារ ដោយសារការកើនឡើងខ្លាំងនៃភាគហ៊ុនក្រុមហ៊ុនផលិតបន្ទះឈីប។

តាមសេចក្តីថ្លែងការណ៍របស់ផ្សារហ៊ុនកូរ៉េ (Korea Exchange) បានឱ្យដឹងថា ខ្លួនបានដំណើរការយន្តការ buy-side sidecar ដែលនាំឱ្យមានការផ្អាកការជួញដូរកម្មវិធី (program trading) សម្រាប់ភាគហ៊ុនដែលចុះបញ្ជីនៅលើ KOSPI រយៈពេល 5 នាទី មិនយូរប៉ុន្មានបន្ទាប់ពីទីផ្សារបើកដំណើរការ។

សន្ទស្សន៍ KOSPI បានកើនឡើងជាង 5% ដោយសារកំណើនខ្លាំងរបស់ក្រុមហ៊ុនផលិតបន្ទះឈីបធំៗ គឺ Samsung Electronics និង SK Hynix ដែលបានកើនឡើង 4.9% និង 9.6% រៀងៗខ្លួន។ ភាគហ៊ុនទាំងពីរបានកើនឡើងតាមការឡើងថ្លៃរបស់ Micron បន្ទាប់ពីក្រុមហ៊ុនផលិតបន្ទះឈីបអង្គចងចាំរបស់សហរដ្ឋអាមេរិកមួយនេះ បានប្រកាសលទ្ធផលហិរញ្ញវត្ថុ និងទស្សនវិស័យអាជីវកម្មដ៏រឹងមាំកាលពីយប់មុន។

ភាគហ៊ុន Micron Technology Inc. បានកើនឡើងជាង 13% ក្នុងការជួញដូរក្រៅម៉ោងនៅសហរដ្ឋអាមេរិក។

SK Hynix ស្ថិតក្នុងចំណោមភាគហ៊ុនដែលមានសមិទ្ធផលល្អបំផុតនៅលើ KOSPI បន្ទាប់ពីក្រុមហ៊ុនផលិតបន្ទះឈីបអង្គចងចាំនេះ បានប្រកាសកាលពីថ្ងៃពុធពីផែនការប្រមូលទុនចំនួន 29.4 ពាន់លានដុល្លារ តាមរយៈការចុះបញ្ជីភាគហ៊ុននៅទីផ្សារហ៊ុនសហរដ្ឋអាមេរិក ខណៈដែលក្រុមហ៊ុនផ្គត់ផ្គង់ឱ្យ Nvidia មួយនេះ កំពុងស្វែងរកឱកាសទាញយកអត្ថប្រយោជន៍បន្ថែមពីតម្រូវការខ្លាំងលើភាគហ៊ុនពាក់ព័ន្ធនឹងបញ្ញាសិប្បនិម្មិត (AI)។

ការកើនឡើងនៅថ្ងៃព្រហស្បតិ៍នេះ បានជួយឱ្យ KOSPI ទទួលបានមកវិញនូវភាគច្រើននៃការខាតបង់ដែលបានកើតឡើងកាលពីដើមសប្តាហ៍។ សន្ទស្សន៍នេះបានធ្លាក់ចុះប្រហែល 10% កាលពីថ្ងៃអង្គារ ដោយសារការលក់ចេញយ៉ាងខ្លាំងលើភាគហ៊ុនក្រុមហ៊ុនផលិតបន្ទះឈីបក្នុងស្រុក។