សេដ្ឋកិច្ចអាមេរិកបង្កើតការងារថ្មីចំនួន 57,000 កន្លែងនៅខែមិថុនា

សេដ្ឋកិច្ចសហរដ្ឋអាមេរិកបានបង្កើតការងារថ្មីតិចជាងការរំពឹងទុកនៅក្នុងខែមិថុនា ខណៈអត្រាគ្មានការងារធ្វើបានធ្លាក់ចុះ។ ទិន្នន័យដែលចេញផ្សាយនៅថ្ងៃព្រហស្បតិ៍នេះ អាចក្លាយជាកត្តាមួយដែលមានឥទ្ធិពលលើការសម្រេចចិត្តគោលនយោបាយរូបិយវត្ថុរបស់ធនាគារកណ្តាលអាមេរិក (Fed) ក្នុងប៉ុន្មានខែខាងមុខ។

យោងតាមការិយាល័យស្ថិតិការងារ (BLS) នៃក្រសួងការងារអាមេរិក ចំនួនការងារក្រៅវិស័យកសិកម្ម (Nonfarm Payrolls) បានកើនឡើងត្រឹម 57,000 កន្លែង កាលពីខែមុន ដែលទាបជាងការព្យាករចំនួន 114,000 កន្លែង។ ការកើនឡើងនៃការងារក្នុងវិស័យសេវាកម្មវិជ្ជាជីវៈ និងអាជីវកម្ម សេវាជំនួយសង្គម និងសេវាថែទាំសុខភាព បានជួយទូទាត់ការធ្លាក់ចុះតាមរដូវកាលនៃការជួលបុគ្គលិកក្នុងវិស័យទេសចរណ៍ និងបដិសណ្ឋារកិច្ច។

ជាពិសេស ការងារក្នុងវិស័យស្នាក់នៅ និងសេវាម្ហូបអាហារបានថយចុះ 55,000 កន្លែង ដែលជាការធ្លាក់ចុះគួរឱ្យកត់សម្គាល់ បើទោះបីជាមានព្រឹត្តិការណ៍ប្រកួតបាល់ទាត់ FIFA World Cup កំពុងប្រព្រឹត្តទៅ និងការត្រៀមអបអរសាទរទិវាបុណ្យឯករាជ្យអាមេរិកនៅថ្ងៃទី 4 ខែកក្កដាក៏ដោយ។ នេះបើយោងតាមអ្នកវិភាគរបស់ Capital Economics។

ទន្ទឹមនឹងនេះ ទិន្នន័យការងារខែឧសភាត្រូវបានកែសម្រួលចុះ 43,000 កន្លែង មកនៅត្រឹម 129,000 កន្លែង។ នៅពេលបូកបញ្ចូលការកែសម្រួលចុះសម្រាប់ខែមេសាផងដែរ ចំនួនការងារក្នុងរយៈពេលពីរខែមុនខែមិថុនា មានចំនួនទាបជាងការរាយការណ៍មុន 74,000 កន្លែង។

អត្រាគ្មានការងារធ្វើបានធ្លាក់ចុះបន្តិចមកនៅ 4.2% ខណៈទីផ្សាររំពឹងថានឹងនៅ 4.3% ដែលជាកម្រិតដែលបានរក្សាតាំងពីខែមីនា។ អត្រាចូលរួមកម្លាំងពលកម្មបានធ្លាក់ចុះ 0.3 ភាគរយ មកនៅ 61.5% ហើយសមាមាត្រការងារធ្វើធៀបនឹងចំនួនប្រជាជនបានធ្លាក់ចុះបន្តិចមកនៅ 59%។

អ្នកវិភាគរបស់ Capital Economics បានលើកឡើងថា៖ “ការធ្លាក់ចុះបន្តិចនៃអត្រាគ្មានការងារធ្វើ មិនមែនជាដំណឹងល្អគ្រប់គ្រាន់ដើម្បីលួងលោមទីផ្សារនោះទេ។”

ទិន្នន័យការងារខែមិថុនាបានបញ្ចប់ការកើនឡើងលើសការរំពឹងទុករយៈពេលបីខែជាប់គ្នា។ មុននេះ ភាពរឹងមាំនៃទីផ្សារការងារបានធ្វើឱ្យវិនិយោគិនជឿថា Fed អាចមានលទ្ធភាពបន្ថែមក្នុងការដំឡើងអត្រាការប្រាក់នៅឆ្នាំនេះ ដើម្បីទប់ស្កាត់សម្ពាធអតិផរណាដែលជំរុញដោយថ្លៃថាមពល។

ទោះជាយ៉ាងណា ទិន្នន័យ NFP ចុងក្រោយនេះអាចបន្ថយទស្សនៈរឹតបន្តឹងគោលនយោបាយ (hawkish) ដោយធ្វើឱ្យការរំពឹងទុកផ្លាស់ប្តូរមកនៅចន្លោះ មិនដំឡើងអត្រាការប្រាក់ដល់ដំឡើងតែម្តងក្នុងឆ្នាំ 2026 បើប្រៀបធៀបនឹងការព្យាករមុនដែលរំពឹងថានឹងមាន ការដំឡើងពីមួយទៅពីរលើក។ នេះបើយោងតាម Vital Knowledge។

អ្នកវិភាគបានសរសេរថា “ការរួមបញ្ចូលគ្នារវាងទីផ្សារការងារដែលទន់ខ្សោយ និងការធ្លាក់ចុះខ្លាំងនៃតម្លៃប្រេង នឹងជួយបន្ធូរសម្ពាធលើអត្រាផលចំណេញមូលបត្របំណុល និងផ្តល់ផលវិជ្ជមានដល់ទីផ្សារភាគហ៊ុន។”

បន្ទាប់ពីការចេញផ្សាយរបាយការណ៍នេះ សន្ទស្សន៍អនាគតភាគហ៊ុន Wall Street បានកើនឡើង ខណៈអត្រាផលចំណេញមូលបត្របំណុលរដ្ឋាភិបាលអាមេរិកអាយុ 10 ឆ្នាំ និង 2 ឆ្នាំ បានធ្លាក់ចុះ។ ជាទូទៅ អត្រាផលចំណេញ និងតម្លៃមូលបត្របំណុលមានទិសដៅផ្ទុយគ្នា។

មុនពេលទិន្នន័យនេះត្រូវបានប្រកាស ទីផ្សារហិរញ្ញវត្ថុបានវាយតម្លៃថា មានប្រហែល 50.7% ដែល Fed អាចដំឡើងអត្រាការប្រាក់នៅកិច្ចប្រជុំខែកញ្ញា។ នៅខែមិថុនា Fed បានរក្សាអត្រាការប្រាក់នៅចន្លោះ 3.5% ដល់ 3.75% ប៉ុន្តែការព្យាករថ្មីបង្ហាញថា មន្ត្រី Fed នៅតែរំពឹងថានឹងមានការដំឡើងម្តងនៅក្នុងឆ្នាំនេះ។

តាមទ្រឹស្តី ការដំឡើងអត្រាការប្រាក់អាចជួយទប់ស្កាត់អតិផរណា ដែលមន្ត្រីគោលនយោបាយបារម្ភថាអាចកើនឡើងដោយសារតម្លៃប្រេងកើនឡើង បន្ទាប់ពីការវាយប្រហាររួមរវាងអាមេរិក និងអ៊ីស្រាអែលលើអ៊ីរ៉ង់នៅចុងខែកុម្ភៈ។

ទោះជាយ៉ាងណា តម្លៃប្រេងឆៅបានធ្លាក់ត្រឡប់មកជិតកម្រិតមុនជម្លោះវិញ បន្ទាប់ពីអាមេរិក និងអ៊ីរ៉ង់បានចុះហត្ថលេខាលើក្របខណ្ឌកិច្ចព្រមព្រៀងសន្តិភាពកាលពីខែមិថុនា ដែលបានបន្ធូរបន្ថយក្តីបារម្ភទាំងនេះ។ ថ្លែងកាលពីថ្ងៃពុធ ប្រធានថ្មីរបស់ Fed លោក Kevin Warsh បាននិយាយថា ហានិភ័យអតិផរណាបានថយចុះ ប៉ុន្តែលោកមិនបានផ្តល់សញ្ញាអំពីទិសដៅអត្រាការប្រាក់នាពេលខាងមុខឡើយ។

ក្រៅពីការគ្រប់គ្រងអតិផរណា Fed ក៏មានភារកិច្ចលើកកម្ពស់ការងារឱ្យបានអតិបរមាផងដែរ។ ការដំឡើងអត្រាការប្រាក់អាចបន្ថយល្បឿនកំណើនសេដ្ឋកិច្ច និងប៉ះពាល់ដល់ការជួលបុគ្គលិក។

ជារួម ទិន្នន័យការងារខែមិថុនាបង្ហាញថា ទីផ្សារការងារអាមេរិក «មានស្ថិរភាពក្នុងរយៈពេលប៉ុន្មានខែចុងក្រោយ» ប៉ុន្តែ «មិនទាន់បង្ហាញសញ្ញានៃការងើបឡើងវិញខ្លាំងនៅឡើយទេ» នេះបើយោងតាមអ្នកវិភាគរបស់ Capital Economics ដឹកនាំដោយ Bradley Saunders។